شعر

رضا أبو النجا كتب: ياما شايلة

ياما شايلة 
ياما شايله ياأرض مصر
ياما شايله يا بلدنا
شايله عشه وشايله قصر
شايله حانه وشايله مدنه
شايله حاتي وشايله آتِي
من زقاق العنكبوت
شايله حِت وشايله حوووت
شايله حافي ومليونير
شايله باشا وباش أجير
شايله نخل و ” منخولين “
شايله نحل و ” منحولين “
شايله شمع وكل شمعه
شايله دمع وكل دمعه
شايله صرخة ألف عين
شايله تحت وشايله فوق
في العماير والشقوق
ألف نجمه ع المشانق
شايله عتمه ف عرض ضوء
شايله قطر بيمشي سطر
ويدّي سطر لـ عزرائيل
شايله مينا وعبّارات
شايله مونه وسقالات
واللي جاي زي اللي فاااات
واللي ما ت من غير غسيل
شايله كرسي وشايله كورس
من بداية عهد حورس
طبالين علي زمارين..!
شايله رجل وشايله إيد
في السلاسل والحديد
شايله عبد وشايله سيد
شايله قبّه وأُبّهااااات
نضارات علي بارفانات
شايله قهر وأهرامات
شايله عاااالم كله ضد
ناس بتبني وناس تهد
ناس بترخي وناس تشد
شايله فوضي ومين يفضّ ؟
مين يرُدّ ومين يرَد ؟
مين يصد ومين يسد ؟
مين يشيل الكمّاماااااات ؟
مين يرجع مصر تاني
والصباح البرتقاني
والعيال الطيبين..!

اظهر المزيد

مقالات ذات صلة

اترك رد

زر الذهاب إلى الأعلى
arArabic

تم كشف مانع الإعلانات

رجاء تعطيل مانع الإعلانات لكي تدعم موقعنا شكرا
%d مدونون معجبون بهذه: