_ ليه يا جدّة ماقدرش أخرج وحدى زى قاسم وأحضر فرح صاحبتى رغم إن الوقت لسه بدرى والشوارع مليانة ناس مش رايحة فى نص الليل مثلاً..
ردت جدتى بصوتها الحنون:
_ عشان الشارع مليان ديابة يا بنيتى والدنيا حَدَانَا وفى زمانا بقت ماشية خِلف خلاف والراجل بدال ما يحارب الديابة عشان بناته يخرجوا ويلعبوا قدام البيت، حبس بناته وساب الديابة واقفة تنهش اللى يطلع.. تعرفى ليه يا بنيتى ترك الديابة واقفة وحبس بناته
_ ليه يا جدّة ؟
_ لأنه لما يطلع بره بيته بيتحول ديب زيهم وينتظر بنات غيره يطلعوا عشان ينهشهم.. والديابة بيلعبوا على مين ينهش بنات غيره وبناته ما حد ينهشهم، والكل خسران يا بنيتى لان ما حد عم ينهش خصمه غير من وراه.. ماتزعليش يا بنيتى قدرك تكونى بنت مش ديب.
